اعمال السباكه

عشان تشتغل سباكة صح 👉👉
لازم تهبط بلاطة الحمام 10 سم عشان تسلك معاك ارتفاع البيبة وميول المواسير اللي المفروض تكون 1سم في المتر ..

بتبدأ سباكة الحمام بانك تكسر مكان الصرف والتغذية بعد ماتحدد مكان الحوض والقاعدة والبانيو وحوض المطبخ ومكــان الغسالة كمان ,,, وبعدين👌

تعزل الارضية وتعمل رقبــة الازازة وتختبر العزل ( هنتكلم عنة بعدين )

بتحدد مكان بيـبـة الصــرف وتحطها ع عزل الارضية وتخرج منها المواسير بميول لاعلي (لانها اوطي نقطة في الحمام) 
بيكون ليها 3 مداخل 2 بوصة بتستخدمهم في صرف الحوض والبانيو والغسالة ومخرج 3 بوصة عليه حاجة اسمها " بُرقع " عشان يمنع ارتداد الروائح والمخرج ده بيرمي ف " عمود الصرف " ( 3 بوصة ) ..

بيتم لحام ماسورة صرف في اخري باستخدام مادة لحام اسمها " الكولــة " ..
خد بــالـك البيبــة بيركبلها حاجة اسمها " زووور" عشان فية فرق بينها وبين السيراميك اللي راكب فوقها ولو مش موجود الزووور ده ،،، هتتسرب المياة وتدخل تحت السيراميك خلال الرمل ودا مرفوض ..

ممنوع استخدام كوع زاوية قايمة ,, ويفضل استخدام كوع مفتوح ..
لو عايز توصل ماسورة قطر 2 بوصة بواحدة قطر 3 بوصة بنستخدم مسلوب ..
مخرج صرف الحوض بنزل من الشيرب 50 سم ..

صرف القاعدة بيكون عن طريق " المنيجــة " وهي ماسورة 4 بوصة خارجة من الحائط بميل لاسفل لايقل عن ( 2سم ) بترمي ع " عمود العمل " وبتكون ع ارتفاع من ( 5-7سم ) من التشطيب ..
خلي بــالكـــ لازم تكون المسافة بين الشيرب واعلي نقطة في مواسير الصرف ع الارضية هي ( 1م + 4سم ) عشان تشطيب الدور ( 1سم رمل + 2سم مونة + 1سم سيراميك ) ..

جريلية الصرف هي عبارة عن نصف ماسورة وليها غطاء خارجي بيكون مع مستوي التشطيب وارتفاعها 10سم فية منها نوعين :-
نوع مخرج صرفة بيجي بكوع من اسفل ( بي ار ) وبالتالي بضطر اكسرلها في الخرسانة مكان الكوع ..
والتاني مخرج صرفة من الجنب ( الشريف ) ودا افضل عشان مش محتاج تكسير طبعا ..

يتبع