ماهو الشيرب؟

ماهو الشيرب؟

اهم حاجة تخلي بالك منها في شغل التشطيبات

اللي هو اساس شغل التشطبيات واللي بنظبط بية كل حاجة سواء ارضيات ,, سقف معلق ,, مخارج كهربا ,, مخارج تغذية وصرف ,, ميول مواسير الصرف ,, تشطيب اول درجة في السلم ..كل الحاجات دي لازم تربطها ببعض عن طريق السنتر فرود 😀 اللي هو الشيرب

الشيرب ؟! .. اللي هو اية ؟!
الشيرب ده علامة معينة بنعملها علي الحوائط في مستوي افقي واحد وتكون علي ارتفاع 1م من وش التشطيب بتاعك .

طب بحدده ازاي ؟!🤔
بتبقي طول فترة المشروع كهيكل خرساني شغال علي نقطة الصفر المعماري واللي بتكون 
( رصيف الشارع ,, قاعدة عمود انارة ,, بلاعة صرف ) ودي اللي بتنسب منها المبني ككل فبتنقل منسوبها ف الموقع وتشتغل عليه .. وبتطلع منه 1 م وبيكون دا الشيرب للمبني بتاعك ودايما بتكون نقلة عند فراغ السلم وشغال منة ..

ولو مش موجود وانا بشطب بخلي السباك يروح عند السلم برة الشقة ويحدده علي ارتفاع 1.10 م من ارضية الخرسانة ( عشان فية 10 سم تشطيب ) وينقلة جوا الشقة ع معظم الحوائط وكمان جوا الحمام والمطبخ .

طب بينقلة ازاي ؟!🤔
بميزان القامة دي طريقة وكلنا عارفينها طبعا 
او بميزان الخرطوم اللي بيبقي مليان مية ,, وبيثبت مستوي المية في احد طرفي الخرطوم ويروح يعلم عند مستوي المية في الطرف التاني من الخرطوم ,, ودي بتعتمد ع نظرية الاواني المستطرقة .

** بظبط منة وش التشطيب عن طريق اني بنزل من الشيرب ده 1 م .
** وكمان بيضمن ان بداية الشبابيك ( الجلســة ) في مستوي واحد .
** بظبط منة منسوب السقف المعلق لو موجود .
** بظبط منة الابواب اللي بيكون ارتفاعها 2.20 م , ودا بيتم عن طريق قياس 1.20 م من الشيرب لحد راس الحلق .
** بظبط منة ميول الحمام وارتفاعات مخارج السباكة للحوض والقاعدة والبانيو والسخان .
** بظبط منة ارتفاعات مفاتيح الكهربا والبرايز وانها تكون علي مستوي واحد عشان الديكور .

طبعا بالنسبة للحمام لازم تكون مهبط السقف بتاعة 10 سم دا في سقف solid slab 
او بتقلل سمك البلاطة بتاع 6 سم في حالة flat slab 
عشان البيبة او الصفاية بتاعة الصرف ( ارتفاعها من 8 ـــ 10 سم ) وكمان ميل المواسير واللي بتكون سم في المتر .

طب لو اثناء الصب معملتش تهبيط ولا تقليل .. هتعمل اية وقتها ؟!🤔
عندك حلين✌️ اما تعلي مستوي التشطيب بتاعك يوصل لــــ 16 سم ..
او تعمل عتبة تخلي الحمام بتاعك مستواة اعلي من مستوي باقي الشقة .

.